جسپریت بمراہ نے ٹیسٹ کرکٹ میں بھارت کیلئے نئی تاریخ رقم کر دی

بھارتی فاسٹ بولر جسپریت بمراہ نے ٹیسٹ کرکٹ میں بھارت کیلئے نئی تاریخ رقم کر دی۔

یکم جنوری کو آئی سی سی کی جانب سے نئی ٹیسٹ پلیئرز رینکنگ جاری کی گئی جس میں جسپریت بمراہ نے اپنے ملک کیلئے نیا ریکارڈ بنادیا۔ 

آئی سی سی کی تازہ ترین ٹیسٹ رینکنگ میں بمراہ نہ صرف بولرز کی فہرست میں پہلے نمبر پر رہے بلکہ کسی بھی بھارتی بولر کے لیے اب تک کے سب سے زیادہ ریٹنگ پوائنٹس کا ریکارڈ بھی قائم کر دیا۔

آسٹریلیا کے خلاف بارڈر گواسکر ٹرافی میں اب تک 4 ٹیسٹ میچز میں بمراہ 30 وکٹیں لے کر نمایاں بولر رہے ہیں۔ 

بارڈرگواسکر ٹرافی میں اپنی شاندار کارکردگی کی وجہ سے بمراہ کے ریٹنگ پوائنٹس بڑھ گئے ہیں اور انہوں نے اب 907 ریٹنگ پوائنٹس حاصل کر لیے ہیں۔ 

جوکہ کسی بھی بھارتی بولر کے سب سے زیادہ ریٹنگ پوائنٹس ہیں۔

اس سے قبل حال ہی میں ریٹائر ہونے والے اسپنر روی چندرن ایشون نے 2016 میں آئی سی سی رینکنگ میں904 ریٹنگ پوائنٹس حاصل کیے تھے۔

واضح رہے کہ جسپریت بمراہ کو سر گارفیلڈ سوبرز ٹرافی کے لیے آئی سی سی مینز کرکٹر آف دی ایئر اور آئی سی سی مینز ٹیسٹ کرکٹر آف دی ایئر ایوارڈ کے لیے نامزد کیا گیا ہے۔