(ویب ڈیسک) پاکستان کے سابق فاسٹ بولر شعیب اختر نے بھارتی فاسٹ بولر جسپریت بمراہ کو مشورہ دیا ہےکہ اپنے کیریئر کو طویل کرنا چاہتے ہیں تو انہیں ٹیسٹ کرکٹ کے مقابلے میں محدود اوورز کی کرکٹ کو فوقیت دینا ہوگی۔
ایک حالیہ انٹرویو میں شعیب اختر کا کہنا تھا کہ جسمپریت بمراہ کی لائن و لینتھ اچھی ہے لیکن ٹیسٹ کرکٹ میں طویل سپیل ہوتے ہیں اور وکٹیں لینے کے لیے آپ کو سپیڈ کی ضرورت ہوتی ہے کیونکہ بیٹر کو جلدی نہیں ہوتی اور وہ رسک نہیں لیتا۔
شعیب اختر کا کہنا تھا کہ بمراہ کو ٹیسٹ کھیلنا ہے تووکٹیں لینے کے لیے سپیڈ بڑھانے اور برقرار رکھنے کی ضرورت ہوگی لیکن اس میں انجری کا خدشہ بھی بڑھ جاتا ہے، اگر میں بمراہ کی جگہ ہوتا تو خود کو وائٹ بال کرکٹ تک محدود کرلیتا۔
راولپنڈی ایکسپریس کا کہنا تھا کہ مجھے خوشی ہوگی اگر بمراہ زیادہ کرکٹ سے پرہیز کرے، بمراہ کو خود کو دیکھنا ہوگا کیونکہ اس نے تمام فارمیٹس کے ساتھ آئی پی ایل بھی کھیلنا ہے۔
شعیب اختر کا یہ بھی کہنا تھا کہ بمراہ دنیائے کرکٹ کا اثاثہ ہے اور ہمیں اس کی حفاظت کرنی چاہیے۔